महोत्तरी – रामगोपालपुर नगरपालिका–५ रामगोपालपुरमा निर्माण सम्पन्न भएको कलवार समुदाय भवन हस्तान्तरण गर्न माग गर्दै स्थानीय कलवार समुदायले नगरपालिकाको ध्यानाकर्षण गराएको छ।

कलवार समुदाय समितिका अध्यक्ष रामपुकार चौधरीको नेतृत्वमा सोमबार नगरपालिकाको कार्यालय पुगेको करिब ४०–५० जनाको समूहले नगरप्रमुख रामदुलार साहलाई प्रेस विज्ञप्ति बुझाउँदै निर्माण सम्पन्न भइसकेको भवन समुदायको जिम्मामा तत्काल हस्तान्तरण गर्न माग गरेको हो।

समुदायका लागि निर्माण गरिएको भवन निर्माण सम्पन्न भइसकेकाले आवश्यक कानुनी तथा प्रशासनिक प्रक्रिया पूरा गरी प्रयोगका लागि समुदायलाई हस्तान्तरण गर्नुपर्ने समितिको माग छ। सामाजिक, सांस्कृतिक तथा सामुदायिक गतिविधि सञ्चालनका लागि निर्माण गरिएको संरचना लामो समयसम्म प्रयोगविहीन राख्न नहुने समुदायको भनाइ छ।

समितिका अध्यक्ष चौधरीले समुदायका लागि निर्माण गरिएको भवनको स्वामित्व र प्रयोगसम्बन्धी विषय स्पष्ट गरी यथाशीघ्र समुदायलाई हस्तान्तरण गर्न नगरपालिकासँग आग्रह गर्नुभयो। उहाँले भवन निर्माणमा सहयोग गर्ने नगरपालिका तथा सम्बन्धित पक्षलाई धन्यवादसमेत दिनुभयो।

रामगोपालपुर नगरपालिका–५ का पूर्ववडा अध्यक्ष जितेन्द्र चौधरीले कलवार समुदायका लागि निर्माण गरिएको भवन सामाजिक तथा सांस्कृतिक गतिविधिका लागि महत्वपूर्ण हुने भएकाले निर्माण सम्पन्न भएपछि सम्बन्धित समुदायलाई प्रयोग गर्न दिनुपर्ने बताउनुभयो। भवन निर्माणको उद्देश्यअनुसार समुदायले उपयोग गर्न पाउने गरी आवश्यक प्रक्रिया अघि बढाउन उहाँले नगरपालिकासँग आग्रह गर्नुभयो।

स्थानीय युवा अरुणकुमार चौधरीले पनि निर्माण सम्पन्न भएको भवनलाई लामो समयसम्म प्रयोगविहीन नराखी समुदायको उपयोगमा ल्याउनुपर्ने बताउनुभयो। सामाजिक तथा सांस्कृतिक गतिविधिका लागि उपयोगी हुने संरचना तत्काल हस्तान्तरण गर्न उहाँले माग गर्नुभयो।

तर, नगरप्रमुख रामदुलार साहले भने भवन निर्माण भएको जग्गा सरकारी स्वामित्वमा रहेकाले कलवार समुदायलाई भवन हस्तान्तरण गर्न नमिल्ने बताउनुभएको छ।

उहाँका अनुसार आर्थिक वर्ष २०८१/८२ मा कलवार समुदायका लागि भनेर विनियोजन गरिएको बजेट फ्रिज हुन नदिन नगर कार्यपालिकाको निर्णयबाट उक्त बजेट सदुपयोग गरी भवन निर्माण गरिएको हो। सरकारी जग्गामा निर्माण गरिएको संरचना कुनै एक समुदाय विशेषलाई हस्तान्तरण गर्ने कानुनी व्यवस्था नरहेको उहाँको भनाइ छ।

नगरप्रमुख साहले सरकारी जग्गामा सरकारी कार्यालय वा सार्वजनिक प्रयोजनका संरचना निर्माण गर्न सकिने भए पनि समुदाय विशेषका लागि भवन निर्माण गरेर सोही समुदायलाई स्वामित्व हस्तान्तरण गर्न नमिल्ने स्पष्ट पार्नुभयो।

भवनको पछाडिपट्टि सामुदायिक विद्यालयसमेत रहेकाले विद्यालयको अगाडि समुदाय विशेषको भवन राख्ने विषय पनि उपयुक्त नभएको उहाँले बताउनुभयो। सरकारी जग्गामा एउटा समुदायलाई भवन हस्तान्तरण गर्ने अभ्यास सुरु गरिए अन्य समुदायबाट पनि यस्तै माग आउन सक्ने भएकाले नगरपालिकाले त्यसलाई स्वीकार गर्न नसक्ने उहाँको भनाइ छ।

निर्माण सम्पन्न भइसकेको भवनको प्रयोग र स्वामित्वको विषयमा समुदाय र नगरपालिकाबीच फरक धारणा देखिएको छ। समुदायले भवन निर्माणको उद्देश्यअनुसार आफूहरूलाई हस्तान्तरण गरी प्रयोग गर्न दिनुपर्ने माग गरिरहेको छ भने नगरपालिकाले सरकारी जग्गा, सार्वजनिक प्रयोजन र कानुनी व्यवस्थाको प्रश्न उठाउँदै समुदाय विशेषलाई हस्तान्तरण गर्न नसकिने जनाएको छ।

भवनको स्वामित्व, प्रयोग र व्यवस्थापनसम्बन्धी विषयमा नगरपालिकाले आगामी दिनमा कस्तो निर्णय लिन्छ भन्ने विषयले यसको उपयोगको अवस्था निर्धारण गर्ने देखिएको छ।